Naxçıvan MR Sahibkarlığın İnkişafı Fondu və Bank Respublikanın birgə təşkilatçılığı ilə Naxçıvan Muxtar Respublikasında “Sahibkar Çətiri” layihəsinə start verilib. Layihənin ilk tədbiri 18 sentyabr 2025-ci il tarixində Şərur rayonunda keçirilib.
Tədbir çərçivəsində sahibkarlarla görüşlər təşkil olunub, ehtiyaclarına uyğun dövlət maliyyə dəstəyi imkanları təqdim olunub. Həmçinin sahibkarlara güzəştli maliyyə vəsaitlərinin əldə olunması qaydaları və digər zəruri məsələlər barədə ətraflı məlumat verilib.
Layihənin əsas məqsədi rayonlarda fəaliyyət göstərən sahibkarların dövlət dəstək mexanizmləri barədə məlumatlandırılması və onların maliyyə resurslarına çıxış imkanlarının artırılmasıdır. Tədbir zamanı sahibkarlara maarifləndirici bukletlər də təqdim olunub.
Layihə sahibkarlar tərəfindən böyük maraqla qarşılanıb və növbəti mərhələdə muxtar respublikanın digər bölgələrində də davam etdirilərək daha geniş sahibkar kütləsinin əhatə olunması nəzərdə tutulur.
