.jpeg)
.jpeg)
Naxçıvan Muxtar Respublikasının İqtisadiyyat Nazirliyində Sahibkarlığın İnkişafı Fondunun cari ilin 9 ayı ərzində həyata keçirdiyi fəaliyyətin nəticələri, sahibkarlığın inkişafı istiqamətində görülən işlər, rəqəmsal yeniliklər və qarşıda duran vəzifələr müzakirə olunub.
İclası giriş sözü ilə açan Naxçıvan Muxtar Respublikasının iqtisadiyyat naziri Kazım Hüseynəliyev sahibkarlığın inkişafının iqtisadi fəallığın artırılması, yeni iş yerlərinin yaradılması, investisiya imkanlarının genişləndirilməsi və regionun iqtisadi potensialının reallaşdırılması baxımından mühüm əhəmiyyət daşıdığını vurğulayıb. Nazir Fondun fəaliyyətinin səmərəliliyinin artırılmasının, sahibkarlara göstərilən dəstək mexanizmlərinin təkmilləşdirilməsinin və müasir idarəetmə yanaşmalarının tətbiqinin vacibliyini diqqətə çatdırıb.
Daha sonra Sahibkarlığın İnkişafı Fondunun idarə heyətinin sədri Vüsal Novruzov Fondun cari ilin ilk 9 ayı üzrə fəaliyyətinə dair hesabatla çıxış edib. Çıxışda hesabat dövründə görülmüş işlər, sahibkarlara verilən güzəştli kreditlər, sahibkarlığın dəstəklənməsi istiqamətində əldə olunan nəticələr və fəaliyyətin prioritet istiqamətləri barədə məlumat verilib. Eyni zamanda, qarşıdakı dövrdə görülməsi nəzərdə tutulan işlər və mövcud imkanlardan daha səmərəli istifadə məsələləri diqqətə çatdırılıb.
İclas çərçivəsində OMS platforması üzrə yeni istifadəyə verilmiş proqram təminatının təqdimatı keçirilib. Təqdimat zamanı proqram təminatının imkanları, iş proseslərinin optimallaşdırılması, məlumatların emalının və idarə edilməsinin təkmilləşdirilməsi, eləcə də rəqəmsal həllərin Fondun gündəlik fəaliyyətində tətbiqi məsələləri nəzərdən keçirilib.
Bununla yanaşı, rəqəmsallaşmanın genişləndirilməsi, iş proseslərində operativliyin və şəffaflığın artırılması, idarəetmədə müasir texnologiyalardan istifadənin gücləndirilməsi, fəaliyyətin səmərəliliyinin yüksəldilməsi və digər aktual məsələlər ətrafında fikir mübadiləsi aparılıb.
İclasın yekununda iqtisadiyyat naziri Kazım Hüseynəliyev müzakirə olunan məsələlər üzrə müvafiq tapşırıqlar verib. Nazir qarşıya qoyulan vəzifələrin vaxtında və keyfiyyətlə icrasının təmin edilməsinin, rəqəmsal yeniliklərin fəaliyyətə səmərəli inteqrasiyasının, sahibkarlara göstərilən dəstəyin daha da təkmilləşdirilməsinin, sahibkarların maliyyə resurslarına əlçatanlığının artırılmasının və Fondun fəaliyyətində nəticəyönümlü yanaşmanın gücləndirilməsinin vacibliyini vurğulayıb.
